We push on, walkin up the street right intae the heart ae the Toi. We’re aw shoutin like fuck noo n tryin tae attract attention, like sharks after a drop ae blood.

‘YOUNG TEAM, IN YER AREA! YOUNG TEAM, IN YER AREA! WHO ARE YI? WHO ARE YI? LET’S GO FUCKIN MENTAL! LET’S GO FUCKIN MENTAL! NA NA NA NA, OI! NA NA NA NA, OI! LET’S GO FUCKIN MENTAL! WE’RE AW FUCKIN MENTAL! IN YIR FUCKIN HOOSE, EATIN AW YIR BISCUITS! FUCK YIR FUCKIN TOI BOIZ, YA DAFTIES. YOUNG TEAM IN YER AREA! Y T FUCKIN P!’

Silhouettes appear in the darkness. Shoutin doon their own torrent ae abuse. Bottles, stones n bricks come flyin doon the street towards us. Whytey takes a bottle tae the heed n hits the deck. Danny drags him back tae his feet n we square-aff in two rough lines. Aw our weapons ir oot noo n we hunt fur missiles ae our ain tae fire back up at them. Big Kenzie n Eck ir at the front. Then Whytey, McColl n Ryans n me, Danny next tae us, Broonie n Finnegan on our left. Cunts ir shoutin our names n more ir appearin fae side streets. Two cunts push through tae the front ae their gang, Div Peters n Matty O’Connor. The full Toi is there n that Matty’s swingin a machete over his heed.

‘INTAE THEM, BOYS!’ Big Kenzie screams n starts chargin. We aw follow shoutin our heeds aff. A’ve git a wine bottle in ma hand n A’m swingin it over ma heed. They’re sprintin at us anaw noo. Soon as we reach them, everycunt in both lines clash. A’m swingin ma wine bottle at Si O’Connor’s heed n he’s duckin n swingin punches back at us. It’s a pure war zone. Everycunt is gittin attacked fae every direction. Matty swings the machete at ma heed n A pull back. It hits ma arm n A feel it cut us through ma jumper n sting like fuck. Big Eck turns n skuds him wae a bakey bat across the dish. He falls sparkled straight tae the deck. A’m still bouncin aboot wae ma wine bottle ready tae take it aff somecunt’s dome. A see Wee Kenzie gittin battered aff Div. A git hit wae a wine bottle across the face but it doesnae burst. A see the white flash, nearly knocked oot, an instant egg formin on ma jaw. A’m staggerin n fawin. Danny jumps in n pulls me up wae the scruff ae the neck oot the road. A’m fucked n heavy dazed but still conscious, yi huv tae keep yir feet or you’d git yir heed bounced on. Whytey is gittin battered aff three Toi wans. It’s oot ae aw fuckin control n turnin bad quick.

More cunts ir runnin doon tae join the onslaught. Ma face n arm ir killin me n there’s blood. There’s folk everywhere noo. Men ir runnin oot their hooses n we’re still aw fightin like fuck. Matty’s back up n rugby tackles Big Kenzie. The two ae them ir scrabblin on the ground in a scrum noo. Si n JP fly fur us but me n Danny fight the two ae them aff n Finnegan tries tae spear them. A turn roon n see Big Kenzie wae a big slash doon his face n everythin breaks apart. It’s aw fucked n we’re done this time. Sound the retreat somecunt n let us git back alive tae lick our wounds n tell tales ae bravery in the face ae the enemy. Every scar wid be a trophy, so long as everycunt made it back.