Nukes pits his hands up in front ay his face. – Whoah … slow doon thair gadgie … what ye fuckin well saying tae ays here? Ye meet this bird whae’s oot fir the first time since she escaped this straight-peg, she’s taken her first ever ecky, you’re E’d up and yir talkin love? Sounds a wee bit like the chemical love tae me. Nowt wrong wi that, but see if it lasts the comedoon before ye start thinkin aboot churches, limos and receptions.

– Well, we’ll see, ah say tae Nukes, noticing how different each ay his profiles is. One side ay his face is dead handsome, the other really geekish. The American-evening-television Nukes and the American-daytime-television Nukes. I’m tryin tae visualise Heather in her totality. All I can think about is eyes and face. It strikes me that ah dinnae even ken what her tits and arse are like: size, shape, form n aw that. It surprises me; ah always clock that sort ay thing first. My face seems never tae be more than a few feet fae hers when we’re thegither. This is defo different, but it would be fuckin horrible tae die the now, just fuckin peg oot withoot ever huvin that total sense ay her.

– Tread warily, Lloyd, that’s aw ah’m sayin, Nukes turns tae show off his good side, – Ye ken how easy it can be tae feel great aboot somebody when yir eckied up. Ah mind ay once a few ay us gaun through tae a Slam do oan the Renfrew Ferry. Ah wis jist comin up oan ma pill n Henzo comes runnin up tae ays sayin, fuckin battle stations here, ye cunt, the place is full ay Motherwell cashies. So ah looks over and sure enough, it’s the whole Saturday Service crew, top boys n aw, groovin doon in a big wey. So ah turns tae Henzo an says: just fuckin chill ya tube. Every cunt’s fuckin loved-up the night. They boys are sound. They’re jist like us, eh; they’ll take the fuckin buzz where they can find it. Disnae matter whether it’s the house buzz wi the E or the swedge buzz wi the adrenalin, it’s aw the same. So ah goes up tae this big cunt ah recognised and wi jist point at each other and laugh for a bit, then it’s big hugs aw roond. He introduces ays tae the rest ay his crew and we’re pertyin away thegither. He says tae me: this rush isnae quite as good as the swedge rush, but ye can get tae sleep easier eftir a few nights. Ah’m up fir days wi the swedge rush, cannae sleep or fuck all. That’s us big mates, but jist wait till we’re next at Fir Park. Nae quarter asked or given, eh.

– So what ye sayin?