‘YT FUCKIN POSSE!’ A roar before A jump aff the wall like a ninja n land on top ae Si. Danny n that arrive as A’m awready rollin aboot wae him. The Toi ir forced intae a corner n everybody shites themselves n pauses fur breath. The rest ae the pupils form the traditional circle roon the action. Si’s back on his feet but there’s nuhin he kin dae. They’re aw frozen tae the spot cos Big Kenzie’s at the front brandishin a bakey bat n they aw know he’s the tap kiddie. He swings it fur Si n it connects wae his shoulder. He’s screamin n hits the deck. ‘YOUNG TEAM, YA FUCKIN BAMS!’ Danny shouts n runs intae the battle. The Toi ir spread oot like a week’s washin.

‘NO SURRENDER!’ Wee Broonie shouts before runnin along the raised wall n jumpin aff. He takes JP doon wae him. It’s a fuckin free fur all. There’s square-goes happnin like fuck noo. Danny turns n lays Niall Watson oot n starts fightin two Fleeto wans. A start goin tae town wae McVeigh. We’re goin punch-fur-punch n he kin fight. A kin feel a few eggs awready. Paul Allen gets whacked a beauty aff Big Kenzie n laid oot on his arse. The only Toi wan left is Owens n he starts wailin like a fuckin wean shitin himself. Addison walks up n whacks him a dillion.

There’s the red flash ae the Big Fat Janny’s jumper like a fire engine hurtlin towards us. A guidance teacher n the male PE teachers, who often took it upon themselves tae act like the bouncers ae the school, fly unto the breach anaw. A solid teacher tries tae grab Wee Kenzie n his big brur hits him a haymaker ae a right. The PE teacher is swayin roon the ring tryin tae recover fae Tam’s KO blow. Big Kenzie is standin firm, wae his bat in his hand again, n aw ae us ir runnin by him, tryin tae hide our faces wae tracky taps n beneath hoods. He’s standin wae his arms oot wide, laughin n no geein a fuck. The remains ae the Toi ir gettin scooped up by the female teachers, the Florence Nightingales ae school square-gos.

‘FUCKIN YOUNG TEEEAM!’ Big Kenzie roars at them aw. There’s pupils, teachers n janitors everywhere n right in the middle, two black polis uniforms right on tap ae us in the Smokers’ Corner. ‘FUCK!’ Big Kenzie shouts n sprints. We’re aw dashin up towards the back gates. Broonie, who isnae a natural track n field man, looks like he’s goin tae take an asthma attack. That cunt spent PE lessons smokin fags in the toilets. A’m fucked anaw but there’s nae chance A’m gittin caught tae face the music maself. The two polis ir sprintin after us, determined tae catch at least a token suspect. Big Kenzie launches his baseball bat over the perimeter fence intae a back garden tae dispose ae the evidence. The open gate n freedom is in sight. A polis meat wagon screams up tae the entrance, blues n twos on, n four ae them jump oot it n start runnin doon the path, blockin our exit.