But now Carrie git use to Mommy, but she still stick pun mi some time. And she na talk ‘bout Granny much. And she luv her school, you know why, cause her teacher have yellow hair!, Mi mean blonde hair. And Carrie like her cause she remind her a woman pun Gilligan Island. You remember Gilligan Island? We use to walk must be two hundred twenty-two mile fi watch pink people with yellow hair pun TV, cause we never did have no TV a we yard. And mi like foreign now cause now mi have a TV inna mi room. And mi don’t have to wear uniform go a school. And mi learn to talk properly and correctly. And mi have nuff nuff clothes, nuff nuff long john, and mi eat nuff nuff McDonalds and yam peanut butter sandwich every day with jam! And mi did tell you sey mi have mi own room? My own room. Cause in Jamaica mi and Carrie and Granny use to sleep pun one bed, in one room! But now in foreign mi have my own room. My own room for mi and mi alone!

She becomes quiet and looks down on the floor.

But sometimes Mr. Brown come inna a mi room. When Mommy gone a work a night time him come inna mi room. And him touch mi. And do things which Granny sey you should’nt mek bwoy do but Mr. Brown him do it. And first time mi did sey no Mr. Brown but him did look like him a go get mad. And remember mi did tell you, that Granny said mi shouldn’t do nothing which will mek him mad. And mi no want him fi send we back, and mi no want him to stop send Granny de money. And Carrie she just a get use to Mommy and now she woulda really bawl if we have to go back now, cause Mr. Brown just buy her three new Barbie and him sey him a go buy we a dream house dolly house, big so! (widens her arms to express the length) And mi no want to go back now! And mi na want to mek him mad. So Mr. Brown happy when him touch mi and him want mi to touch him too… and when him inside mi it hurt… but mi don’t say nothing to mek him mad. (begins to beat her leg, mimicking the rhythm of sex) So when him inside a mi, mi just think ‘bout Carrie three new Barbie, Carrie teacher with her yellow hair, mi and Carrie laughing when we a eat McDonald french fries, and mi licking the snow offa mi lip. (Two beats, and she hits her leg for the last time.) And you know my favourite one to think about is Granny dancing with mi and Carrie when Mr. Brown send her the money. By the time Mr. Brown finish. (beat) Granny still a dance inna mi head…

STACEY-ANNE begins to hum and GRANNY enters dancing, very dreamlike, the other women enter and surround STACEY-ANNE, giving her energy and love. And they begin the song and dance of “healing.” After the dance they all turn away with their back to the audience. STACEY-ANNE remains but she is no longer a little girl she is the voice of a grown woman she recites the following dub poem as the women keep the beat with their feet in a step dance.